कैलालीमा प्रहरी फायरिङ: ज्यान मार्ने प्रयास गरेका दुई जनालाई गोलि हानि पक्राउ

कैलाली । कैलालीमा प्रहरीले गोली चलाएर ज्यान मार्ने उद्योगका आरोपमा फरार रहेका दुई जनालाई पक्राउ गरेको छ।

जिल्ला प्रहरी कार्यालय कैलालीका प्रवक्ता डीएसपी राजकुमार सिंहका अनुसार पक्राउ परेका व्यक्तिहरू मिलन चन्द र रिदम ढुंगाना हुन्। उनीहरू खुकुरी प्रहार गरेर ज्यान मार्ने प्रयास गरेको आरोपमा फरार थिए।

प्रहरीका अनुसार उनीहरूलाई आजै कैलारी गाउँपालिका २ बाट पक्राउ गरिएको थियो। तर, भजनी नगरपालिका–७ स्थित क्षेत्रमा ल्याइँदै गर्दा पिसाब फेर्ने बहानामा भाग्न खोजेपछि प्रहरीलाई बल प्रयोग गर्नुपरेको हो।

“पहिला हवाई फायर गरेर रोक्न खोजियो, तर उनीहरू भाग्न सफल भए। त्यसपछि घुँडामुनि गोली हानेर नियन्त्रणमा लिइएको हो,” प्रवक्ता सिंहले जानकारी दिए। हाल दुवैजनालाई उपचारका लागि धनगढीको सेती प्रादेशिक अस्पताल पठाइएको छ भने घटनाबारे थप अनुसन्धान भइरहेको प्रहरीले जनाएको छ।