कैलाली : पुनर्वास नगरपालिकाले आगामी आर्थिक वर्ष २०८२/०८३ का लागि आफ्नो वार्षिक नीति तथा कार्यक्रम सार्वजनिक गरेको छ, जसमा कृषि क्षेत्रको आधुनिकीकरण, दिगो पूर्वाधार विकास, सामाजिक न्याय र विद्युतीय सुशासनलाई मुख्य प्राथमिकतामा राखिएको छ ।

नगर उप-प्रमुख भुलिया कुमारी रानाले १७ औं नगरसभामार्फत प्रस्तुत गर्नुभएको नीति तथा कार्यक्रममा, निर्वाहमुखी खेतीलाई व्यावसायिक कृषि प्रणालीले प्रतिस्थापन गरी कृषकलाई प्रोत्साहन गर्ने उल्लेख छ । यसका लागि ‘एक वडा, एक कृषि उत्पादन’ कार्यक्रमलाई निरन्तरता दिइनेछ, र कृषिको आधुनिकीकरणका लागि विद्युतीय सिँचाइ तथा आधुनिक कृषि औजारमा अनुदानको व्यवस्था गर्ने नीति लिइनेछ । अर्गानिक खेतीलाई प्रवर्द्धन गर्न प्राङ्गारिक मलको प्रयोगमा प्रोत्साहन गरिनेछ भने उत्पादित वस्तुको बजारीकरणमा नगरपालिकाले समन्वय गर्नेछ । आर्थिक विकासकै क्रममा पशुपालन क्षेत्रलाई व्यवसायीकरण गरी दूध, मासु तथा अण्डामा नगरपालिकालाई आत्मनिर्भर बनाइने लक्ष्य छ ।

यसका साथै वैदेशिक रोजगारीबाट फर्केका युवाहरूलाई उद्यमशीलतामा जोड्न विशेष कार्यक्रम सञ्चालन गरिनेछ भने बेरोजगार नागरिकलाई रोजगारी सिर्जना गर्न ‘पुनर्वास रोजगार प्रवर्द्धन केन्द्र’ स्थापना गरिनेछ । पूर्वाधार विकासतर्फ, नगरभित्रका मुख्य तथा सहायक सडकहरूलाई बाह्रै महिना सञ्चालन हुने गरी स्तरोन्नति र मर्मत गरिनेछ । अघिल्लो आर्थिक वर्षमा सम्पन्न हुन नसकेका कालोपत्रे सडक र भवन निर्माणका योजनालाई प्राथमिकताका साथ निरन्तरता दिइनेछ ।पुनर्वास रङ्गशाला र कोल्ड स्टोर निर्माण कार्यलाई पहिलो प्राथमिकतामा राखेर प्रक्रिया अघि बढाइनेछ, साथै सम्पूर्ण भौतिक संरचनाहरू अपाङ्गमैत्री बनाइने नीतिलाई निरन्तरता दिइनेछ ।

सामाजिक क्षेत्रतर्फ, “हाम्रो सभ्य पुनर्वास नगर, गुणस्तरीय शिक्षामा समतामुलक अवसर” भन्ने आदर्श वाक्यका साथ सबै विद्यालयमा बालमैत्री र अपाङ्गमैत्री वातावरण सिर्जना गरिनेछ । ‘एक शिक्षक, एक ल्यापटप’ कार्यक्रमलाई निरन्तरता दिइनेछ र कक्षा ५ र ८ को वार्षिक परीक्षा नगरस्तरमा सञ्चालन गरी उत्कृष्ट विद्यार्थीलाई पुरस्कृत गर्ने नीति लिइनेछ । स्वास्थ्य क्षेत्रमा आम नगरवासीलाई आधारभूत स्वास्थ्य सेवामा पहुँच सुनिश्चित गरिनेछ । नगरमा एक सर्पदंश उपचार केन्द्र स्थापना गर्न पहल गरिनेछ र रेडक्रससँग समन्वय गरी नगरवासीका लागि आवश्यक पर्ने रगत निःशुल्क उपलब्ध गराउने व्यवस्थालाई निरन्तरता दिइनेछ । सुत्केरी पोषण कार्यक्रम र ज्येष्ठ नागरिकका लागि निःशुल्क स्वास्थ्य जाँचका कार्यक्रम पनि सञ्चालन गरिनेछ ।

सामाजिक क्षेत्रतर्फ, “हाम्रो सभ्य पुनर्वास नगर, गुणस्तरीय शिक्षामा समतामुलक अवसर” भन्ने आदर्श वाक्यका साथ सबै विद्यालयमा बालमैत्री र अपाङ्गमैत्री वातावरण सिर्जना गरिनेछ । ‘एक शिक्षक, एक ल्यापटप’ कार्यक्रमलाई निरन्तरता दिइनेछ र कक्षा ५ र ८ को वार्षिक परीक्षा नगरस्तरमा सञ्चालन गरी उत्कृष्ट विद्यार्थीलाई पुरस्कृत गर्ने नीति लिइनेछ । स्वास्थ्य क्षेत्रमा आम नगरवासीलाई आधारभूत स्वास्थ्य सेवामा पहुँच सुनिश्चित गरिनेछ । नगरमा एक सर्पदंश उपचार केन्द्र स्थापना गर्न पहल गरिनेछ र रेडक्रससँग समन्वय गरी नगरवासीका लागि आवश्यक पर्ने रगत निःशुल्क उपलब्ध गराउने व्यवस्थालाई निरन्तरता दिइनेछ । सुत्केरी पोषण कार्यक्रम र ज्येष्ठ नागरिकका लागि निःशुल्क स्वास्थ्य जाँचका कार्यक्रम पनि सञ्चालन गरिनेछ ।