सरकारले डेङ्गी सचेतनामा विशेष कार्यक्रम घोषणा गर्‍यो

काठमाडौं-  स्वास्थ्य तथा जनसंख्या मन्त्रालयले साउन महिनालाई डेङ्गी सचेतना महिनाका रूपमा घोषणा गरेको छ।

बुधबार काठमाडौंमा आयोजित एक कार्यक्रमकाबीच स्वास्थ्यमन्त्री प्रदीप पौडेलले डेङ्गी नियन्त्रण गर्न साउन महिनालाई डेङ्गी सचेतना महिनाका रुपमा राष्ट्रिय अभियान सञ्चालन गर्ने घोषणा गरेका हुन्।

अभियान घोषणा गर्दै मन्त्री पौडेलले साउन महिनाबाट डेङ्गी संक्रमणको जोखिम हुने भएकाले सचेतना अभियान सञ्चालन गर्न लागिएको जानकारी दिए। उनले डेङ्गी संक्रमणबाट आम नागरिकलाई जोगाउने दायित्व सरकारको भएकाले डेङ्गी सचेतना नै एकमात्र विकल्प रहेको जानकारी पनि दिए।

मन्त्री पौडेलले लामखुट्टे र लार्भा उत्पादन हुने आधार नष्ट गर्न अवको चार महिना सवै नागरिकसाथै निकायहरू सजग हुनुपर्ने पनि बताए।

डेङ्गी सचेतना राष्ट्रिय अभियान कार्यान्वयनको विषय समाजको पनि भएकाले सवै एक भएर डेङ्गी नियन्त्रणमा केन्द्रित हुनुपर्ने मन्त्री पौडेलले बताए।

डेंगी संक्रमण भदौदेखि कात्तिकसम्म उच्च रहने स्वास्थ्य मन्त्रालयले जानकारी दिएको छ।

सन् २०२४ मा विश्वभर १ करोड ४० लाखभन्दा बढी व्यक्तिहरूमा डेङ्गी संक्रमण भएको र ११ हजारभन्दा बढीको मृत्यु भएको स्वास्थ्य सेवा विभागले जनाएको छ।