हायू परिवारलाई लगाइयो आफन्तको जिम्मा

काठ्माण्डौँ। सिन्धुलीको गोलन्जोर गाउँपालिका–६ छेत्पाबाट सम्पर्कविहीन भएका र कास्कीको पोखरा महानगरपालिका–३० गगनगौडामा फेला परेका उर्मिला हायूको परिवारलाई आफन्तको जिम्मा लगाइएको छ।

पोखरा–३० स्थित सोमनाथ पौडेल र चन्द्र भण्डारीको घरमा सोमबार बेलुका भेटिएका उनीहरूलाई ज्वाइँ नाता पर्ने धनबहादुर तामाङको जिम्मा लगाइएको सहायक प्रमुख जिल्ला अधिकारी शिव लम्सालले जानकारी दिए।

उनीहरूलाई पोखरा महानगरपालिका–३० का वडा अध्यक्ष दुर्गाप्रसाद सुवेदीको रोहबरमा आफन्तको जिम्मा लगाइएको हो।

प्रहरीका अनुसार, हराएकामध्येकी कमला हायुका पति धनबहादुर तामाङ हुन्। प्रहरीसँगको बयानमा परिवारले बेलाबेलामा बिरामी भइरहने र धामीले त्यहाँ नबस्न भनेपछि छेत्पाबाट हिँडेको बताएका छन्।