सुदूर पश्चिम खेलकुदको सदस्य सचिवमा लोक बहादुर खड्का नियुक्त

धनगढी,२९ जेठ । सुदूरपश्चिम प्रदेश खेलकुद परिषदको सदस्य सचिवमा लोकबहादुर खड्का (रवि) नियुक्त भएका छन्।

सामाजिक विकास मन्त्रालयको सिफारिसमा प्रदेश मन्त्रिपरिषद्को बैठकले खड्कालाई चार वर्षका लागि सदस्य सचिवमा नियुक्त गरेको हो ।

मन्त्रिपरिषदको बैठकको निर्णयपछि मुख्यमन्त्री कमल बहादुर शाह र सामाजिक विकास मन्त्री मेघराज खड्काले खड्कालाई बधाई दिदै कार्यकालको सफलताको शुभकामना दिए ।

खड्कालाई भोलि सामाजिक विकास मन्त्री मेघराज खड्काले शपथ ग्रहण गराउने बताईएको छ । कैलाली जिल्ला कुस्ती संघका पूर्व अध्यक्ष खड्का फुटबल र हक्कीका पूर्वखेलाडी हुन्।

पूर्वमन्त्री तथा नेपाली काँग्रेसका युवा नेता प्रकाश देउवाको सिफारिसमा सदस्य सचिव बनेका खड्कालाई नेपाली काँग्रेस कैलालीका सभापति नारायणदत्त भट्ट, नेपाली काँग्रेस, क्षेत्रीय समिति, धनगढी नगरसमिति, नेपाल विद्यार्थी संघ, तरुण दल कैलालीको समर्थन प्राप्त थियो । ती सबै कमिटिले खड्कालाई सदस्य सचिव नियुक्त गर्न सिफारिस गरेका थिए ।

तीन महिनादेखि सुदूरपश्चिम प्रदेश खेलकुद परिषद्को सदस्य सचिव पदमा रिक्त थियो।