अष्टिन,(टेक्सास), ३१ अगष्ट ।
टेक्सासको अष्टिनमा गौरा पर्व शनिवार धुमधामसंग मनाईएको छ ।

सुदूर पश्चिम नेपाली समाज टेक्सास र ग्रेटर अष्टिन नेपाली सोसाईटीको आयोजनामा अष्टिनको पशुपतीनाथ मन्दिरमा गौरा पर्व धुमधामसंग मनाईएको हो । 

गौरा पर्वका अवसरमा गौरी पूजा, दुबधागो अभिषेक, गौरादेवी र महेश्वर नृत्य, प्रसाद वितरण, गौरा सेलाउने लगायतका कार्य बिधि पूर्वक गरिए । 

गौरा पर्वका अवसरमा आयोजित कार्यक्रममा सुदूर पश्चिमकी चर्चित गायिका रेखा जोशी र नेपाल आईडल रवि ओडको सांगितिक प्रस्तुतिले पशुपतीनाथ मन्दिर क्षेत्र देउडा मय भयो । गायिका जोशीको ‘सुन हौ कि चाँदी हौ’ बोलको गीतले सबैलाई मन्त्रमुग्ध बनायो । 

टेक्सासका बिभिन्न भागबाट गौरा पर्वमा सहभागी भएका सुदूरपश्चिमेलीसंगै अन्य समुदायका व्यक्तिहरुले देउडा खेलेर भरपुर मनोरञ्जन लिए ।

सुदूर पश्चिम नेपाली समाज टेक्सासका अध्यक्ष गगन केसीको अध्यक्षतामा सम्पन्न भएको कार्यक्रममा सुदूर पश्चिम समाजका अगुवा तथा पदम ठकुराठीले स्वागत मन्तव्य व्यक्त गरे ।

गौरा पर्वको माहत्म्यमाथि सुदूरपश्चिम समाजका अगुवा केशव जोशीले चर्चा गरे ।

कार्यक्रममा ग्रेटर अष्टिन नेपाली सोसाईटीका अध्यक्ष विदूर खतिवडा र पूर्व अध्यक्ष भोजराज भट्टले शुभकामना मन्तव्य व्यक्त गरे । कार्यक्रमको सञ्चालन गौरा पर्व संयोजक सुरेन्द्र प्रसाद अवस्थीले गरेका थिए ।