नेपाल र वेस्ट इन्डिजबीचको खेलको टिकट बुकिङ खुल्यो

काठमाडौं : नेपाली राष्ट्रिय क्रिकेट टोलीले विश्व क्रिकेटको पावरहाउस मानिने वेस्ट इन्डिजसँग खेल्ने तीन खेलको टिकट मूल्य सार्वजनिक भएको छ।

संयुक्त अरब इमिरेट्स (यूएई)को शारजाह क्रिकेट स्टेडियममा हुने प्रतियोगिताका लागि नेपाल क्रिकेट संघ (क्यान)ले टिकट मूल्य निर्धारण गरेको हो।

नेपाली समयअनुसार राति सवा ८ बजे हुने खेलका लागि सवा ६ बजे गेट खुला हुनेछ।

खेलका लागि आधिकारिक टिकट बिक्री खुला भइसकेको छ। खेलको आधिकारिक टिकटिङ पार्टनर ‘क्यू-टिकट्स’ रहेको छ, जहाँबाट समर्थकहरूले अनलाइन टिकट खरिद गर्न सक्नेछन्।

टिकटको मूल्य दर्शकदिर्घाअनुसार फरक-फरक तोकिएको छ। नर्थ वेस्ट र इस्ट स्ट्यान्ड ५० दिराम अर्थान १९ सय रुपैयाँ, इस्ट स्ट्यान्ड र वेस्ट स्ट्यान्ड (पारिवारिक)का लागि ६० दिराम अर्थात २३ सय रुपैयाँ राखिएको छ।

यसका अलावा गोल्ड र प्लाटिनम प्याभिलियनका लागि १०० दिराम अर्थात ३८ सय रुपैयाँ छ भने वेस्ट भीआईपी सुइटका लागि ४०० दिराम अर्थात १५ हजार रुपैयाँ मूल्य तोकिएको छ।

दुई पटकको टी-२० विश्वविजेता वेस्ट इन्डिजसँगको यो सिरिजले नेपाली क्रिकेटलाई अन्तर्राष्ट्रिय स्तरमा आफ्नो क्षमता प्रदर्शन गर्ने सुनौलो अवसर प्रदान गर्नेछ।

यूएईमा ठूलो संख्यामा रहेका नेपाली क्रिकेट समर्थकहरूका लागि यो सिरिज निकै उत्साहजनक हुने अपेक्षा गरिएको छ।