कञ्चनपुर । कञ्चनपुरको भीमदत्त नगरपालिका–१८, जनज्योति चोक हुँदै वडा नं। २ को वडा कार्यालय जोड्ने कच्ची सडक कालोपत्रे हुँदा यहाँका बासिन्दालाई सहज भएको छ । सुदूरपश्चिम प्रदेश सरकारको लगानीमा जनज्योति टोल हुँदै हरियाली जोड्ने सडक कालोपत्रे गरिँदा अहिले यहाँका स्थानीयलाई आवतजावतमा सहजता भएको छ । पूर्वाधार विकास कार्यालय कञ्चनपुरका अनुसार यस वर्ष सो टोलमा ३७० मिटर कालोपत्रे र ७४२ मिटर सडक मर्मत गरिएको हो । 

गतिलो सडक नहुँदा विगतमा यात्रा गर्न निकै कठिन हुने गरेको स्थानीय अटो चालक सीताराम डगौराले बताए । “यो सडक भएर अटो चलाउँदा पार्टपुर्जा बिग्रने, यात्रा गर्न असहज हुने गरेको थियो,” उनले भने, “अहिले यात्रा गर्न पनि सहज भएको छ ।”

सडक कालोपत्रे गरिँदा विद्यार्थीलाई पनि सहज भएको छ । जनज्योति क्याम्पसमा स्नातक दोस्रो वर्षमा अध्ययनरत रमिता बोहोराले क्याम्पस जाँदा सास्ती हुने गरेकोमा अहिले सहजता भएको बताए । प्रदेश सरकारको भौतिक पूर्वाधार विकास मन्त्रालयले कञ्चनपुरमा यस वर्ष ३१ किलोमिटर सडक कालोपत्रे गरेको छ । पूर्वाधार विकास कार्यालय कञ्चनपुरले भीमदत्त नगरपालिका–६ स्थित शान्ति निकेतन टोल नयाँ प्रतिभाको पश्चिम हुँदै भगवती टोल जोड्ने ३०६ मिटर सडक कालोपत्रे गरेको छ । यस्तै नवदुर्गा महादेव टोलमा २१५ मिटर सडक कालोपत्रे गरिएको पूर्वाधार विकास कार्यालय कञ्चनपुरका इन्जिनियर हेमराज भट्टले जानकारी दिए। 

यस्तै भीमदत्त नगरपालिका–६ स्थित पूर्णागिरि टोलमा ४६२ मिटर सडक कालोपत्रे र ८० मिटर आरसिसी गरिएको छ । निर्माणको जिम्मा पाएको उत्तम कन्स्ट्रक्सनले ३२ लाख ८३ हजारको लागतमा सडक कालोपत्रे गरेको जनाइएको छ । पूर्वाधार विकास कार्यालय कञ्चनपुरले गत वर्ष, भीमदत्त नगरपालिका–१८, वनदेवी मन्दिर हुँदै उत्तरतर्फ जाने ११० मिटर सडक कालोपत्रे गरेको थियो । प्रदेश सरकारको २० लाखको लगानीमा सो सडक निर्माणको काम भएको पूर्वाधार विकास कार्यालय कञ्चनपुरका प्रमुख योगेन्द्र अधिकारीले जानकारी दिए । 

भीमदत्त नगरपालिका–४, वनदेवी मन्दिर हुँदै उत्तरतर्फ जाने सडक यस वर्ष कालोपत्रे भएपछि यहाँका स्थानी हर्षित छन् । बर्सौंदेखि स्थानीय सरकारको उपेक्षामा परेको सो सडक प्रदेश सरकारले कालोपत्रे गरेपछि यात्रा गर्न सहज भएको भगतपुरका स्थानीय श्याम न्यौपानेले बताए । पूर्वाधार विकास कार्यालय कञ्चनपुरले यस वर्ष वेदकोट नगरपालिकामा एक करोड ५४ लाख ७८ हजारको लागतमा २।६ किलोमिटर सडक ज्ञान जेभीले कालोपत्रेको काम गरेको इन्जिनियर हेमराज भट्टले जानकारी दिए । वेदकोट नगरपालिका–१ स्थित पिपलथला हुँदै हात्तीथला जोड्ने एक किलोमिटर सडक कालोपत्रे गरिएको पूर्वाधार विकास कार्यालय कञ्चनपुरले जनाएको छ । 

यस्तै वडा नम्बर ३ सामादैजीदेखि हेल्थपोस्टसम्मको चार सय मिटर सडक कालोपत्रे, वडा नम्बर ४ स्थित सिद्धवैजनाथ सामुदायिक वन कल्पटे मन्दिर हुँदै नहरसम्मको २९० मिटर सडकको कालोपत्रेको काम सम्पन्न गरेको पूर्वाधार विकास कार्यालय कञ्चनपुरका प्रमुख अधिकारीले बताए । 

शुक्लाफाँटा नगरपालिकामा गत आर्थिक वर्षमा ८६ लाख ५२ हजारको लागतमा प्रदेश सरकारले चार किलोमिटर सडक कालोपत्रे गरेको छ । पूर्वाधार विकास कार्यालय कञ्चनपुरका इन्जिनियर हेमराज भट्टका अनुसार वडा नम्बर १ स्थित लौटा भकुन्डा, सुन्दर टोल हुँदै वनशाह राना बस्ती सिद्धवैजनाथ स्कुल जोड्ने दुई हजार ३४५ मिटर सडक गत वर्ष प्रदेश सरकारले स्तरोन्नति गरेको छ । 

यस्तै सो क्षेत्रमा ५५१ मिटर सडक कालोपत्रे र एक हजार ७९४ मिटर सडक ग्राभेल गरिएको पूर्वाधार विकास कार्यालय कञ्चनपुरका इन्जिनियर भट्टले बताए  । यस्तै वडा नम्बर २ स्थित पिपलचौतारी टोल हुँदै सिद्धवैजनाथ माविको उत्तरपट्टिको ६६२ मिटर सडक कालोपत्रेको काम भएको इन्जिनियर भट्टले बताए । 

यस्तै गत वर्ष पुनर्वास नगरपालिकामा प्रदेश सरकारले १० किलोमिटर सडक कालोपत्रेको गरेको छ । पुनर्वास कोटिहोम जाने ३।५ किलोमिटर सडक कालोपत्रे गरिएको छ । यस्तै पुनर्वास नगरपालिका–११ ९नेपाल–भारत सिमाना० देखि इलाका प्रशासन जोड्ने ३।८ किलोमिटर सडक कालोपत्रे गरिएको पूर्वाधार विकास कार्यालय कञ्चनपुरले जनाएको छ । 

पुरानो कम्पनी डाँडादेखि पशुपति चौराहामा २।५ किलोमिटर सडक कालोपत्रेको काम अन्तिम चरणमा रहेको पूर्वाधार विकास कार्यालय कञ्चनपुरका प्रमुख अधिकारीले बताए । यस्तै पुनर्वासको भकुन्डा ढक्का महेन्द्र बस्ती जोड्ने २।८ किलोमिटर सडक गत वर्ष कालोपत्रे गरिएको छ । प्रदेश सरकारले बस्ती बस्तीमा अधुरा रहेका सडकलाई कालोपत्रे गरेपछि सहज भएको स्थानीयले बताएका छन् ।

स्थानीय गीता तामाङले प्रदेश सरकारले सडक कालोपत्रे गरेपछि बर्सौंदेखि यात्रामा कठिनाइ भोग्नु परेकोमा अब भने सहज भएको बताए ।