एक वर्षमा ५८ हजार ४७२ अपराधका घटना दर्ता

काठमाडौँ । प्रहरीका युनिटहरूमा पछिल्लो १ वर्षमा ५८ हजार ४७२ अपराधका घटना दर्ता भएका छन् । २०८१ साउनदेखि २०८२ असार मसान्तसम्ममा ५८ हजार ४७२ अपराधका घटना दर्ता भएको प्रहरी प्रवक्ता (डीआईजी) विनोद घिमिरेले जानकारी दिए ।

आइतबार प्रहरी प्रधान कार्यालयमा पत्रकार सम्मेलन गरेर उनले भने, ‘अघिल्लो आर्थिक वर्षको तुलनामा यस वर्ष अपराध दर्ता सङ्ख्यामा कमी आएको छ ।’

आर्थिक वर्ष २०८०–०८१ मा ५९ हजार २०३ अपराध दर्ता भएको थियो । अघिल्लो वर्षको तुलनामा १ दशमलव २३ प्रतिशतको दरले अपराध दर्ता सङ्ख्यामा कमी आएको प्रहरी प्रधान कार्यालयको विश्लेषण छ । आर्थिक वर्ष २०७९–०८० मा ५६ हजार ३२३ अपराध दर्ता भएको थियो ।

पछिल्लो आर्थिक वर्षमा सबैभन्दा धेरै बैंकिङ कसुरको जाहेरी दर्ता भएको छ । सो अवधिमा १३ हजार ८३७ वटा बैंकिङ कसुरको जाहेरी दर्ता भएको डीआईजी घिमिरेले बताए । उनले भने, ‘ बैंकिङ कसुरको सबैभन्दा धेरै जाहेरी काठमाडौँ उपत्यकामा दर्ता भएको छ ।’

एक वर्षमा उपत्यकाका ३ वटा जिल्लामा ८ हजार ८० वटा बैङ्किङ कसुरको जाहेरी दर्ता भएको छ । सो सङ्ख्या देशभर दर्ता भएको कुल सङ्ख्याको ५८ दशमलव ३९ प्रतिशत हुन आउँछ ।